pupus

  • Pangajabku……..
    Pangangkahku….
    Pirang-pirang taun
    Pirang-pirang windu
    Tumpes keles dening wektu
    Cures anut ilining banyu
    Atiku ajur ilang
    Kari layon gilang-gilang
    Pupus kandhas tanpa tilas
    Silem kelem jroning jinem
    Lebur tumpur ajur mumur

    Sadurunge dak wedharake isining atiku
    Kang tansah ngreridhu kalbu
    Kowe wis kebacut lunga
    Wis lumayang wor lan mega
    Kekablak lawan dewaning asmara

    Ya gene………
    Sekar-sekar panggah mekar
    Ambabar ganda mangambar
    Pratanggapati sumunar?
    Sawetara……….

    Atiku bubar ambyar
    Prasasat angus kobar
    Ninggal mawa kang amblasar
    Sasat dahana mangalad
    Siniram ing udan riris
    Tresnaku pepes
    Mung kari atis……………

Iklan